I durust maśkar Jerez (Espània) ta Victoria (Gozo, Malta), solduj kandidàte evropikane śerutne fòrura e kulturaqe ando 2031 kotar lenqe thema, protagonisardǎs avdives jekh vasni padmad anglal e vizitaça ki Jerez kotar jekh oficiàlo delegàcia kotar i maltesikani diz, tradini kotar o Victoriaqo bareder, o Brian Azzopardi, ta bare mujale kotar o Gozikano regionàlo rajpen, kon sas line institucional ando Jerezikani Komùna kotar i bareder Mª José García Pelayo ta o municipàlo sombeśipen.
Akaja oficiàlo recèpcia kerel pes o angluno phiro kàste ovel o phralipen maśkar solduj dizǎ vi sas i angluni buti andi jekh zorali butǎqi agènda savi buxlǎrèla pes ko avindo martǐ aj sas śirdini avdives ando Jerezikano Alkàzar (Filatǐn) kana sas avridino o inklusiaqo seminàro impulsisardo kotar o Jerezikano Atenèo.
Adaćhande, e dizǎ Jerez aj Victoria praovaren lesqo somogi te zorǎren i durust kotar solduj kandidature te promovisaren iniciatìve kotar jekh xor sociàlo kompromìsoça ando brakhipen e evropikane molaimatenqe vase barabaripen, tolerànza aj ververipen. Kadial si o Inklusiaqo Seminàro, ke ovèla ʒi tehàra, kaj, khetanes e presentàciaça kotar o CulturePIEqo projèkto tradino kotar o Atenèo kotar Jerez, avèna vakerde verver temàtike sar o phirnipnasqo modèli vasi sociàlo integràcia e Rromanipnasqe andi Jerez ja i integràcia e migrantikane populàciaqe andi diz, maśkar aver.