I kandidatùra #Jerez2031 Evropikano Kulturaqo Śerutno Foresqe agordǎs sukcesoça i kendrutni fàsa kotar laqo vastelipnasqo procèso kana o palutno kurko sas ondine e Projects Labesqe agoròrurǎ. Akala dinamikane thana e som-keripnasqe sas lenqe o aktivikano vastelipen kotar maj buteder desar jekh paś śel kulturikane, socialone aj siklǎripnasqe agentòrura kotar i sasti Kadizikani provìncia so, adaćhande, ʒanavde aj somtherde buteder desar 80 konkrèt projèktura te aven inkluidime ando kandidaturaqo kulturikano progràmo.
Kadial #Jerez2031 ʒal anglal ando laqo kandidaturaqo procèso telal ʒi opral, kerindoj o themutnipnasqo vastelipen sar leitmotiv laqe butǎqi dinàmika. Akaja sas, ćaćes, i res kotar akaja śerutni fàsa kotar o vastelipnasqo procèso so agordǎs pes e keripnaça e Ágoras Projects Lab sar thana e somkeripnasqe te propozisarel aj maśkarparuvel konkret propozìcie ande verver agrinǎ: baśavipen, phuv, dikhipnasqe, nakhavipnasqe.
E Ágoras Projects Lab kidènas i buti kotar e Ágoras Ideas Lab kerdine o nakhlo ćhon źulajine aj sas ondine maśkar o luj ʒi ki źoj e palutno kurkesθar ande verver sombutǎrne thana kotar o Butlabǎrnenqo kher kotar o Kadizikani Universitetaqo Jerezikano Kàmpus. Akava vastelipnasqo procèso mekèlas, kotar o somkeripen, te arakhel themutne propozìcie te aven andre ande verver programaciaqe lìne andi kandidaturaqi pustik (bid book).