E Rroma si jekh sastes integrisardo khetanipen andi sa i dizǎθe kotar Jerez, àma sas jekh vaxt so sas lenqe jekh ùlica. E dikhipnaça ćhivdo ando seripen, no dikhindoj e avindipnasqe, i diz kamèlas te prinʒarel o darrinalo aj phervalo isipen kotar o Rromano Them e lathipnaça kotar jekh sikavni andi purikani “Ùlica e Rromenqe” (akanutni ù/ Gómez Carrillo) andi somserimàtenqi avlin kotar o Andaluzikane Rromenqo aj Rromněnqo Dives, so ondǒl pes sarkon 22to e novembraqe.
O suro, prabeśtǎrdo kotar i Bareder kotar Jerez, María José García-Pelayo, nakhavde e Tel-Bareder o Agustín Muñoz ta o Jaime Espinar, aj e delegàtura Francisco Zurita ta Carmen Pina, sas organizisardo kotar i Fondàcia Secretariado Gitano.
I sociàlo aj kulturikano inklùsia kotar o Rromano Khetanipen andi diz si jekh maśkar e singularitetenθar kotar i kandidatùra kotar Jerez e Evropikano Śerutno Fòro kotar i Kultùra ando 2031. Ćaćes, adakurke ondǒlas pes ando Jerez o Maśkarthemutno Kongrèso Theripen aj Rromanipen. Akava ondipen sas o phandipnasqo butǎripen kotar o somseripnasqo programa so, saste 2025qe berśe, biavǒl pes andi sasti Espanjaθe o 600 berśenqo pheripen kotar o isipen amare themesθe kotar o Rromano Them.
